Mahallalarda aholi turmushini yaxshilash uchun 56 trillion so‘m mablag‘ ajratiladi
Shavkat Mirziyoyev raisligida aholi murojaatlari bilan ishlash tizimini takomillashtirish masalalariga bag‘ishlangan videoselektor yig‘ilishi bo‘lib o‘tmoqda.
O‘zbekistonda aholi soni 38 milliondan, mehnatga layoqatli fuqarolar soni esa 20 milliondan oshgan. Bu haqda Shavkat Mirziyoyev raisligida o‘tkazilayotgan videoselektor yig‘ilishida ma’lum qilindi.
Yig‘ilishda ma’lum qilinishicha, so‘nggi to‘qqiz yil ichida aholining daromadlari ikki baravar ko‘paygan.
Davlat rahbari aholining muammolarini joyida hal etish maqsadida vazirlar va hokimlarning mahallalarda ishlab, fuqarolar bilan bevosita muloqot qilish tizimi yo‘lga qo‘yilganini eslatdi. Joriy yilda ham mahallalarda aholi turmushini yaxshilash uchun 56 trillion so‘m mablag‘ ajratilishi rejalashtirilgani bildirildi.
Prezidentning ta’kidlashicha, mavjud imkoniyatlarga qaramay, aholi tomonidan ko‘tarilayotgan masalalarga o‘z vaqtida yechim topish darajasi tanqidiy tahlil qilinishi lozim. Shu munosabat bilan davlat idoralarini xalqqa yaqinlashtirish maqsadida tashkil etilgan Xalq qabulxonalarining faoliyatini zamon talablari asosida yangilash zarurligi qayd etildi.
Yig‘ilishda bundan buyon “Har bir inson va xonadon muammosini bilib, vaqtida ko‘mak berish” tamoyili barcha darajadagi hokimlar, vazirlar hamda ularning hududiy tashkilotlari rahbarlari faoliyatining asosiy qoidasi bo‘lishi kerakligi ta’kidlandi.
