Netanyahu Eronning yangi oliy rahbariga va “Hizbulloh” yetakchisiga o‘lim bilan tahdid qildi
Shuningdek, Isroil bosh vaziri Eron rejimini ichkaridan ag‘darish uchun zarur sharoit yaratilayotganini aytdi.
Isroil bosh vaziri Binyamin Netanyahu Mujtabo Xomanaiyga “hayot sug‘urtasi” bermasligini aytdi. Bu haqda Reuters xabar berdi.
Netanyahu Eron bilan urush boshlanganidan buyon ilk bor matbuot anjumanida ishtirok etdi. U Eron “endi avvalgidek emasligini” va Islom inqilobi qo‘riqchilari korpusi hamda Basij yarimharbiy kuchlariga zarba berilganini ma’lum qildi.
Shuningdek, u urushga qo‘shilgan Livanning "Hizbulloh" guruhi bilan hujumlar davom etishini bildirdi. Eronning sobiq oliy rahbari Ali Xomanaiy 28-fevral kuni havo hujumlari natijasida halok bo‘lgach, 2-mart kuni “Hizbulloh” Isroilga qarshi zarbalar berdi. Xabarlarga ko‘ra, Livan guruhi bu harakatni Xomanaiyning o‘limi uchun qasos deb atadi. Ali Xomanaiyning o‘rnini o‘g‘li Mujtabo Xomanaiy egalladi.
Netanyahu Eronning yangi oliy rahnamosi va “Hizbulloh” yetakchisiga qarshi qanday choralar ko‘rilishi haqida so‘ralganda, u: “Men terrorchi tashkilot rahbarlaridan birortasiga ham hayot sug‘urtasi polisini bermagan bo‘lardim… Bu yerda nimalarni rejalashtirayotganimiz yoki nima qilmoqchi ekanimiz haqida aniq hisobot berish niyatim yo‘q”, — deb javob berdi.
Isroil bosh vazirining ma’lum qilishicha, Eronga qilinayotgan hujumning maqsadi Tehronning yadroviy va ballistik raketa dasturlari tufayli yuzaga kelayotgan “ekzistensial tahdidni bartaraf etish”dir.
Shu bilan birga, u eronliklarni hukumatga qarshi qo‘zg‘alonga undash orqali rejimni ag‘darishga chaqirgan.
Netanyahu urush boshlanganidan beri Eron hukumatiga qarshi norozilik alomatlari kuzatilmaganini qayd etdi va: “Biz rejimni ag‘darish uchun optimal sharoitlarni yaratmoqdamiz, ammo Eron xalqi rejimni ichkaridan ag‘daradi. Biz yordam bera olamiz va yordam beryapmiz”, — dedi.
