Nobel mukofoti endi meni qiziqtirmaydi — Tramp

AQSh prezidenti Donald Tramp Nobel tinchlik mukofoti masalasini muhokama qilishni istamasligini e’lon qildi. Washington Examiner jurnalisti bilan suhbatda Trampga Eron bilan harbiy operatsiya uning mukofotni yutish imkoniyatini oshiradimi, degan savol berilganida, prezident shunday javob berdi: “Bilmayman. Men endi qiziqmayman”.

 

Shuningdek, yaqin kunlarda xorijiy yetakchilar bilan olib borilgan suhbatlarda Nobel mukofoti mavzusi ko‘tarilganmi, degan savolga Tramp: “Yo‘q, men Nobel mukofoti haqida gapirmayapman”, deb javob bergan.

 

2025-yilda Tramp Nobel tinchlik mukofotiga nomzod bo‘lish uchun faol lobbichilik kampaniyasini boshlagandi. G‘alaba qozona olmagach, AQSh prezidenti endi “tinchlik haqida o‘ylashga majbur emasligini” bildirgan.

 

2025-yil oktabr oyida Nobel tinchlik mukofoti Venesuela muxolifati yetakchisi Mariya Korina Machadoga Venesuelada demokratiyani rivojlantirish borasidagi sa’y-harakatlari uchun topshirilgan. Keyinchalik Machado oʻz mukofotini Amerika prezidentiga topshirishga tayyorligini aytib , bu mukofot Venesuela xalqidan ekanligini va ular "albatta uni u [Tramp] bilan baham koʻrishni istashlarini" taʼkidlagan. Machado 16-yanvar kuni Oq uyda boʻlib oʻtgan uchrashuvda prezidentga Nobel mukofoti medalini topshirgan.