Ozarbayjonda qo‘lga olingan qo‘qonlik tabib qo‘yib yuborildi
Iqboljon Soliyev Bokudagi xususiy shifoxonada bemorlarni ruxsatsiz ko‘rikdan o‘tkazgani uchun hibsga olingan edi.
Xalq tabobati bilan shug‘ullanuvchi Iqbol Soliyev Ozarbayjonning Boku shahridagi BI ES VIP klinikasida qo‘lga olingandi. U oradan ko‘p vaqt o‘tmay qo‘yib yuborildi. Bu haqda Lenta.az xabar berdi.
Ma’lum qilinishicha, politsiya bo‘limida Iqbol Soliyevga nisbatan qonunchilikka muvofiq tegishli intizomiy choralar ko‘rilgan.
Shundan so‘ng uni Ozarbayjondan chiqarib yuborish ta’minlangan.
Soliyev Bokudagi klinikalardan birida bemorlarni ruxsatsiz tarzda qabul qilgani ortidan hibsga olingan edi. Uning qabuliga kelganlar soni ko‘pligi sabab muassasa hududida katta navbatlar va tartibsizliklar yuzaga kelgan. U o‘zini bioenergiya, energiya terapiyasi bilan davolovchi sifatida tanishtirib, har bir bemor uchun 60 manat (400 ming so‘m) atrofida haq olgan.
Klinika ma’muriyati esa Soliyev ushbu tibbiyot muassasasining rasmiy xodimi emasligini bildirgan. Shunga qaramay, u ikki kun davomida bemorlarni qabul qilganidan so‘ng klinikani tark etgan.
Avvalroq Soliyev Farg‘ona viloyat sudi qaroriga ko‘ra 10 sutkaga qamalgan edi. Keyinchalik u o‘zining Instagram sahifasida ozodlikka chiqqanini ma’lum qilib, tabobat faoliyati uchun rasmiy ruxsati yo‘qligi haqidagi xabarlarni rad etgan.
