Oʻzbekistonda bir yil ichida hokimning 252 yordamchisi jinoiy javobgarlikka tortildi
Sudlar mansabdor shaxslar ishtirokidagi 153 ta jinoyat ishini ko‘rib chiqdi.
O‘zbekistonda o‘tgan yil davomida 252 nafar hokim yordamchisi korrupsiya bilan bog‘liq jinoyatlar uchun jinoiy javobgarlikka tortildi. Bu haqda Korrupsiyaga qarshi kurash agentligi ma’lum qildi.
Ma’lumotlarga ko‘ra, hisobot davrida sudlar tomonidan mansabdor shaxslar ishtirokidagi jami 153 ta jinoyat ishi ko‘rib chiqilgan. Ushbu ishlar doirasida turli lavozimlarda faoliyat yuritgan hokim yordamchilarining korrupsiyaga oid qonunbuzarliklari aniqlangan.
Agentlik ta’kidlashicha, hokim yordamchilari faoliyati ustidan doimiy monitoring olib borilmoqda. Bu jarayon hududlarda yuzaga kelishi mumkin bo‘lgan quyi darajadagi korrupsiya xavflarini aniqlash hamda ularning faoliyatida shaffoflikni ta’minlashga qaratilgan.
Sud qarorlariga ko‘ra, aybdor deb topilgan shaxslarga nisbatan turli jazo choralar qo‘llanilgan.
Jumladan, 37 nafar shaxs ozodlikdan mahrum qilish jazosiga hukm qilingan, 38 nafarga ozodlikni cheklash jazosi tayinlangan. Eng ko‘p qo‘llangan jazo turi axloq tuzatish ishlari bo‘lib, 160 nafar shaxsga nisbatan ushbu chora qo‘llangan. Shuningdek, 12 nafar sudlangan shaxs jarimaga tortilgan, yana 5 nafarga boshqa turdagi jazolar tayinlangan.
Mutasaddilarga ko‘ra, bunday choralar hududlarda korrupsiya holatlarining oldini olish hamda davlat xizmatida qonuniylik va ochiqlikni ta’minlashga qaratilgan.
