Pokistondan O‘zbekistonga ilk charter yuk reysi orqali 17 tonna go‘sht olib kelindi
Havo yuk tashish hajmi bosqichma-bosqich 100 tonnagacha oshirilishi rejalashtirilgan.
O‘zbekiston va Pokiston oʻrtasida oziq-ovqat taʼminoti sohasida ikki mamlakat oʻrtasidagi hamkorlikni rivojlantirishga qaratilgan birinchi charter yuk reysi muvaffaqiyatli yakunlandi.
12-mart kuni mahalliy vaqt bilan soat 21:10 da Lahordan kelgan Boeing 737 samolyoti orqali Toshkent xalqaro aeroportiga oziq-ovqat mahsulotlari, xususan 17 tonna go‘sht yetkazib berilgan.
Parvoz Pokistonning Air Eagle aviakompaniyasi tomonidan amalga oshirilgan. Ushbu reys Air Speed Charter charter aviakompaniyasi tashabbusi bilan bajarilgan va kelajakda shunga o‘xshash yuk reyslarini muntazam amalga oshirish rejalashtirilgan.
Loyihaga ko‘ra, havo yuk tashish hajmi bosqichma-bosqich oshirilishi kutilmoqda. Oxir-oqibat, har bir reysda tashiladigan yuk hajmi 100 tonnagacha yetkazilishi rejalashtirilgan.
