Rossiya Erondagi urush tufayli neftdan kuniga qo‘shimcha 150 million dollar daromad olmoqda
Yaqin Sharqdagi keskinlik Rossiyaga 12 kun ichida jami 1,3-1,9 milliard dollar daromad keltirdi.
Yaqin Sharqdagi vaziyat kuchayishi va neft narxining o‘sishi tufayli Rossiya xomashyo eksportidan qo‘shimcha daromad olmoqda. Financial Timesning taxminlariga ko‘ra, hozirda Rossiya byudjeti rejalashtirilgan daromaddan kuniga taxminan 150 million dollar qo‘shimcha tushum olmoqda.
Ma’lum qilinishicha, urushning dastlabki 12 kunida Rossiyaning neft daromadi 1,3–1,9 milliard dollarga oshgan. Agar neft narxi barrel uchun 70–80 dollar atrofida qolaversa, mart oyida Rossiya byudjetiga tushadigan qo‘shimcha daromad 3,3–4,9 milliard dollarni tashkil qilishi mumkin.
AQSH Hindistonga Rossiya neftini sotib olishni vaqtinchalik ko‘paytirishga ruxsat bergach, Hindiston kompaniyalari yangi shartnomalarni tezlashtirdi.
Financial Times ma’lumotiga ko‘ra, faqat besh kun ichida ular taxminan 30 million barrel neft yetkazib berish bo‘yicha kelishuvga erishdi – bu fevral oyida sotib olingan jami miqdor bilan teng.
Shuningdek, Xitoy neftni qayta ishlash korxonalari ham xaridlarni oshirmoqda. Tahlilchilarning qayd etishicha, agar inqiroz davom etsa, Hindiston va Xitoy Rossiya nefti uchun raqobatga kirishishi mumkin, bu esa hozirda bir barrel neft narxining (85 dollar) yanada oshishiga olib keladi.
