Rossiyada 15 kishilik narkoguruh qo‘lga olindi, ular orasida o‘zbekistonliklar ham bor

Rossiyaning Chelyabinsk viloyatida uyushgan jinoiy guruh faoliyati yuzasidan olib borilgan tergov yakuniga yetdi. Mazkur ish doirasida 15 nafar shaxs uyushgan jinoyatchilik guruhida ishtirok etish hamda giyohvand moddalarni noqonuniy aylanishida ayblanmoqda. Bu haqda TASS xabar berdi.

 

Tergov ma’lumotlariga ko‘ra, gumonlanuvchilar orasida O‘zbekiston, Tojikiston hamda Rossiya fuqarolari bor. Ular turli hududlarda faoliyat yuritgan yirik narkoguruh tarkibida ishlaganlikda gumon qilinmoqda.

 

Aniqlanishicha, jinoiy guruh giyohvand moddalarni internet orqali tashkil etilgan onlayn-do‘konlar orqali tarqatib kelgan. Narkotik moddalar Sverdlovsk viloyati, Kurgan viloyati, Voronej viloyati, Moskva viloyati hamda Perm o‘lkasi hududlarida ham tarqatilgan.

 

Huquq-tartibot idoralari tomonidan o‘tkazilgan tezkor tadbirlar davomida gumonlanuvchilardan geroin va metadon kabi 44 kilogrammdan ortiq giyohvand moddalar musodara qilingan.

 

Tergov materiallariga ko‘ra, mazkur guruh jami 134 ta turli og‘irlikdagi giyohvand moddalar bilan bog‘liq jinoyatlarni sodir etgan.

 

Barcha gumonlanuvchilar hibsga olingan. Ularga nisbatan jinoiy tashkilotda ishtirok etish hamda giyohvand moddalar savdosiga urinish bo‘yicha ayblovlar qo‘yilgan. Jinoyat ishi Kurchatovskiy tuman sudiga yuborilgan bo‘lib, sud jarayoni yaqin kunlarda boshlanishi kutilmoqda.