Saudiya Arabistonidan o‘zbekistonliklarni evakuatsiya qilish ishlari yakunlandi.
Yaqin Sharqdan 32 mingdan ortiq O‘zbekiston fuqarosi evakuatsiya qilindi.
13-mart kuni soat 07:00 holatiga ko‘ra, xorijda bo‘lgan 32 934 nafar O‘zbekiston fuqarosi Vatanga qaytarilgan. Bu haqda Tashqi ishlar vazirligi matbuot xizmati xabar berdi.
Ma’lum qilinishicha, 12-mart kuni O‘zbekistonning Qatardagi elchixonasi ko‘magida 49 nafar fuqaro BAA va Saudiya Arabistoniga yetkazilib, u yerdan Toshkentga uchib ketishi ta’minlangan.
“Hozirda navbatdagi fuqarolar guruhi shakllantirilmoqda va ularning Doha shahridan Dubay orqali O‘zbekistonga qaytishi masalasi ko‘rib chiqilmoqda”, deyiladi vazirlik xabarida.
BAAdagi diplomatik vakolatxonalar yordamida 147 nafar fuqaro Toshkentga jo‘natilgan. Erondagi elchixona esa 5 nafar vatandoshning qo‘shni davlatlar hududi orqali chiqib ketishiga ko‘maklashgan.
Shu bilan birga, Isroilda bo‘lgan 4 nafar O‘zbekiston fuqarosining Misr orqali Vatanga qaytishi tashkil etilgan.
Shuningdek, O‘zbekistonning Saudiya Arabistonidagi elchixonasi, Jidda shahridagi bosh konsulxonasi hamda Transport vazirligi hamkorligida charter reyslari orqali 2 735 nafar fuqaro O‘zbekistonga qaytarilgan. Mazkur mamlakatda evakuatsiya jarayoni yakunlangan.
Tashqi ishlar vazirligiga ko‘ra, O‘zbekiston fuqarolarini xavfsiz tarzda Vatanga qaytarish bo‘yicha diplomatik vakolatxonalar faoliyati davom etmoqda.
