"Ayrim hududlar hokimlari sayyor qabullarni "nomiga" o‘tkazyapti" — prezident
“Buxoro, Karmana, Uchquduq, Sardoba, Xovos, Bo‘stonliq tumanlari, Angren, G‘ozg‘on shahar hokimlari mahalladagi 4-5 nafar odam bilan “nomiga” gaplashib, sayyor qabul o‘tkazdim deb yuribdi”, — dedi Shavkat Mirziyoyev.
Prezident raisligida o‘tkazilayotgan videoselektor yig‘ilishida mamlakatda aholi murojaatlari bilan ishlash holati tahlil qilindi.
Ma’lum qilinishicha, respublika bo‘yicha har o‘n ming kishiga o‘rtacha 319 ta ariza va shikoyat to‘g‘ri kelmoqda. Biroq ayrim hududlarda bu ko‘rsatkich ancha yuqori.
Xususan, Toshkent shahrida har o‘n ming aholiga 535 ta murojaat to‘g‘ri keladi. Shuningdek, Navoiy viloyatida 462 ta, Sirdaryo va Surxondaryo viloyatlarida 452 tadan, Jizzax viloyatida 430 ta, Qashqadaryo viloyatida 368 ta, Toshkent viloyatida esa 350 ta murojaat qayd etilgan.
Dehqonobod va Mirobod tumanlari hamda Navoiy, Ohangaron va Yangiyer shaharlarida har o‘n ming aholiga to‘g‘ri keladigan arizalar soni boshqa hududlarga nisbatan ikki baravar yuqori ekani ta’kidlandi.
Yig‘ilishda murojaatlar soni respublika bo‘yicha o‘rtacha 16 foizga kamaygani aytilgan bo‘lsa-da, Qorovulbozor, Nurota, Konimex, Tuproqqal’a tumanlari hamda Namangan shahrida bu ko‘rsatkich o‘tgan yilga nisbatan 50 foizgacha oshgani qayd etildi.
Shuningdek, Buxoro, Karmana, Uchquduq, Sardoba, Xovos, Bo‘stonliq tumanlari hamda Angren va G‘ozg‘on shaharlarida ayrim rahbarlar sayyor qabullarni yuzaki o‘tkazayotgani tanqid qilindi.
