Toshkentda FVB xodimi 1500 dollar pora bilan qo‘lga tushdi
U korxona rahbaridan yong‘in xavfsizligi jihozlarini qabul qilish bo‘yicha bayonnoma rasmiylashtirib berish evaziga pul talab qilgan.
Davlat xavfsizlik xizmatining Toshkent shahri bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamenti bilan hamkorlikda o‘tkazilgan tezkor tadbirda Favqulodda vaziyatlar vazirligining Yangi Hayot tuman bo‘limi kichik inspektori pora olayotgan vaqtida ashyoviy dalillar bilan ushlandi. Bu haqda DXX Zamon.uzga xabar berdi.
Aniqlanishicha, mansabdor shaxs xizmat mavqeini suiiste’mol qilib, mahalliy MChJ rahbaridan 1500 AQSh dollari talab qilgan. U hamkasblari orqali mazkur tuman hududida faoliyat yuritayotgan korxonaga o‘rnatilgan yong‘in xavfsizligi jihozlarini qabul qilish bo‘yicha bayonnoma rasmiylashtirib berish evaziga ushbu pulni so‘ragan.
O‘tkazilgan tezkor tadbir davomida u pul mablag‘larini olayotgan vaqtida qo‘lga olingan.
Mazkur holat yuzasidan unga nisbatan Jinoyat kodeksining 168-moddasi 3-qismi “v” bandi hamda 28, 211-moddasi 1-qismi bilan jinoyat ishi qo‘zg‘atilib, gumonlanuvchiga nisbatan “qamoq” ehtiyot chorasi qo‘llanilgan va tergov harakatlari olib borilmoqda.
