Turkiya ustidan urib tushirilgan raketalar uchinchi tomon tomonidan otilgan — Eron elchisi
Elchining ta’kidlashicha hodisa do‘stona munosabatlarga putur yetkazishga qaratilgan bo‘lishi mumkin.
Eronning Anqaradagi elchisi Muhammad Hasan Habibullohzoda Turkiya ustidan urib tushirilgan raketalar hodisasida mamlakati aloqador emasligini va hodisani qo‘shma ishchi guruh tomonidan tekshirishni kutayotganini ma’lum qildi.
“Biz Turkiyaning milliy suverenitetini hurmat qilamiz. Shu munosabat bilan, qurolli kuchlarimiz, Bosh shtab va Tashqi ishlar vazirligi ilgari biron bir raketa yoki oʻq-dorilar hujumini rad etgan bayonot berishgan edi. Hodisani batafsilroq tekshirish uchun guruh tuzishni taklif qildik. Bizning fikrimizcha, bu harakatlar mamlakatlarimiz oʻrtasidagi do‘stona va qardoshlik munosabatlariga putur yetkazishga qaratilgan uchinchi tomonlar tomonidan sodir etilgan boʻlishi mumkin”, degan elchi Anqarada jurnalistlarga.
Habibullohzoda mintaqadagi harbiy vaziyatga izoh berar ekan, Eron “hech kimga hujum qilmaganini” ta’kidladi: “Ular bizga hujum qilishdi. Muzokaralar davomida bizga hujum qilindi, AQSh diplomatiyaga xiyonat qildi. Hujumlar yadroviy muzokaralar texnik bosqichga yetayotgan paytda boshlandi”, dedi elchi.
Elchi shuningdek, Eron o‘zini qonuniy yo‘llar bilan himoya qilayotganini qayd etgan: “Biz mamlakatimizni himoya qilmoqdamiz. Hozir ham, siz bilan gaplashayotganimda, mamlakatim hujum ostida. Kasalxonalar, infratuzilma va banklarga hujum qilinmoqda va koʻplab tinch aholi halok boʻlmoqda”, deya qo‘shimcha qilgan u.
