Ustyurtdagi quduqdan katta bosim bilan tabiiy gaz oqimi olindi
Tabiiy gaz iste’molchilarga yetkazish maqsadida quduq gaz infratuzilmasiga ulanadi.
12-mart kuni G‘arbiy Quyi Surgil koniga qarashli 17-son baholash ishlatish qudug‘idan katta bosim bilan sanoat miqyosidagi tabiiy gaz oqimi olindi. Bu haqda “O‘zbekneftgaz” AJ xabar berdi.
“O‘zbekneftgaz" xabariga ko‘ra, mazkur geologik-texnik tadbirlar tabiiy gaz qazib olish va zahiralarni ko‘paytirish maqsadida Ustyurt hududida amalga oshirilmoqda.
Ma’lum qilinishicha, quduq mutaxassislar tomonidan burg‘ilanib, geologik-geofizik ma’lumotlar tahlili asosida 4597–4750 metr chuqurlikdagi istiqbolli qatlamlardan gaz oqimi olindi.
Hozirda yangi mahsuldor qatlamlardan olinayotgan tabiiy gazni iste’molchilarga yetkazish uchun yer usti sanoat maydonlarini texnologik jihozlash, gaz uzatish quvurlari va tarmoqlarni qurish, shuningdek quduqni ishga tushirish bo‘yicha yakuniy bosqichdagi gidrodinamik tadqiqot ishlari olib borilmoqda.
Tez kunlarda tabiiy gaz iste’molchilarga yetkazish maqsadida quduq gaz infratuzilmasiga ulanadi.
