Dunyo sog‘liqni saqlashdan ko‘ra urushlarga ko‘proq mablag‘ sarflamoqda — JSST

Jahon sogʻliqni saqlash tashkiloti bosh direktori Tedros Adhanom Gebreyesus 13-Global Boku forumida mamlakatlarni harbiy xarajatlarni oshirish o‘rniga ustuvorliklarini qayta ko‘rib chiqishga va kelajakdagi pandemiyalarga tayyorgarlikni kuchaytirishga chaqirdi.

 

Uning ta’kidlashicha, global harbiy xarajatlar 2025-yilda 2,7 trillion dollarga yetgan bo‘lib, bu 2030-yilga kelib ocharchilikni tugatish uchun zarur bo‘lgan mablag‘dan qariyb 30 baravar ko‘pdir.

 

Shuningdek, u COVID-19 pandemiyasini “ko‘rinmas dushman” deb atab, bu kasallik taxminan 20 million inson hayotiga zomin bo‘lganini va global iqtisodiyotga 10 trillion dollardan ortiq zarar yetkazganini eslatdi. Bu ko‘rsatkich zamonaviy tarixdagi ko‘plab urushlarning iqtisodiy oqibatlaridan ham yuqori ekani ta’kidlandi.

 

Gebreyesusning so‘zlariga ko‘ra, sog‘liqni saqlash sohasi xalqaro hamkorlik uchun muhim platformaga aylanishi kerak.

 

JSSTga a’zo davlatlar pandemiyalar bo‘yicha kelishuvni qabul qilgan bo‘lib, u ratifikatsiya qilingandan so‘ng global tayyorgarlikni mustahkamlashda muhim vositaga aylanishi kutilmoqda.

 

Bundan tashqari, patogenlarni almashish mexanizmi hamda vaksinalar va dori-darmonlarga teng huquqli kirishni ta’minlash bo‘yicha xalqaro muzokaralar olib borilmoqda.

 

“Biz bitta turmiz, bir sayyorada yashayapmiz, bir xil DNKga egamiz va bir xil tahdidlarga duch kelamiz”, — dedi Gebreyesus. U mamlakatlar va xalqaro institutlar o‘rtasidagi ishonchni tiklash kelajakdagi global inqirozlarga samarali javob berishning muhim sharti ekanini ta’kidladi.