Eron FIFAdan AQShning Jahon chempionatini o'tkazish huquqini bekor qilishni talab qildi

Eron FIFAdan AQShning Jahon chempionatini o'tkazish huquqini bekor qilishni talab qildi

 

Sport vazirining ta’kidlashicha, Eron atrofidagi harbiy mojaro va urush holati musobaqaga tayyorgarlikka salbiy ta’sir ko‘rsatmoqda

 

Eron hukumati FIFAdan harbiy mojaro sabab AQShning Jahon chempionatini o‘tkazish huquqini bekor qilishni talab qildi. Bu haqda Eron sport vaziri Ahmad Donyamali ma’lum qildi.

 

Vazirning ta’kidlashicha, Eron atrofidagi harbiy mojaro va mamlakatdagi urush holati tufayli xalqaro musobaqalarda ishtirok etish bilan bog‘liq bir qator muammolar yuzaga kelmoqda.

 

“FIFA Qo‘shma Shtatlardan Jahon chempionatini o‘tkazish imkoniyatini tortib olishi kerak edi”, — dedi Donyamali CNN telekanaliga bergan intervyusida.

 

Uning qayd etishicha, turnir boshlanishiga uch oyga yaqin vaqt qolgan bo‘lsa-da, Eron hali ham urush sharoitida bo‘lib, bu holat mamlakatdagi ko‘plab faoliyat sohalariga, jumladan, aviaqatnovlarga ham ta’sir ko‘rsatmoqda.

 

Shuningdek, vazir Qo‘shma Shtatlardagi eronlik sportchilarning xavfsizligi masalasidan xavotir bildirgan.

 

“Biz agar Meksika va FIFA tegishli sharoitlarni yarata olsa, o‘yinlarimizni Meksikada o‘tkazishga tayyor ekanimizni bildirdik. Biroq urush sharoitida buning uchun zarur shartlar hali ta’minlanmagan. Umid qilamanki, futbolchilarimiz Jahon chempionatida ishtirok eta oladigan sharoitlar yaratiladi, ammo hozircha bunday imkoniyat mavjud emas”, — degan u.

 

Ma’lumot uchun, 2026-yilgi FIFA Jahon chempionati tarixda ilk bor 48 ta milliy terma jamoa ishtirokida o‘tkaziladi. Musobaqa 2026-yil 11-iyundan 19-iyulgacha AQSh, Kanada va Meksikada bo‘lib o‘tishi rejalashtirilgan.

 

Qur’a natijalariga ko‘ra, Eron terma jamoasi G guruhidan joy olgan bo‘lib, unda Belgiya, Misr va Yangi Zelandiya terma jamoalari bilan bahs olib borishi kerak. Guruh o‘yinlari AQSh hududida o‘tkazilishi rejalashtirilgan edi.