Farg‘onada soliqdan qarzdor zapravka xatlandi
Maʼlum bo‘lishicha, shoxobcha 143 mln soliq qarzini to‘lamagan.
Majburiy ijro byurosining Yozyovon tuman bo‘limi tomonidan ish yurituvida bo‘lgan soliq qarzdorliklarini undirishga qaratilgan ijro hujjatlari yuzasidan majburiy ijro harakatlari izchil amalga oshirib kelinmoqda.
Jumladan, bo‘lim ish yurituvida mavjud qarzdor “OL” MCHJdan 143 million so‘m miqdoridagi soliq qarzini undirish to‘g‘risidagi ijro hujjatlari bo‘yicha tegishli choralar ko‘rildi.
Qarzdor jamiyat rahbari bir necha marotaba ogohlantirilishi va qonuniy tushuntirishlar berilganiga qaramasdan soliq qarzdorligini ixtiyoriy ravishda to‘lamagan.
Shu sababli, viloyat soliq organlari xodimlari bilan hamkorlikda qarzdor jamiyatga tegishli bo‘lgan avtomobillarga benzin yoqilg‘isi quyish shoxobchasi (AYOQSH) aniqlanib, belgilangan tartibda xatlandi.
Maʼlum qilinishicha, agar qarzdorlik belgilangan muddatlarda qoplanmasa, ushbu mulk qonunchilikka muvofiq realizatsiya qilinishi mumkin.
