Farg‘onada yangi turizm mahsulotlari va yo‘nalishlari yaratiladi
Farg‘ona viloyatida turizm sohasini rivojlantirish, yangi loyihalarni shakllantirish va sohada mavjud muammolarni muhokama qilish maqsadida ochiq muloqot tashkil etildi.
O‘zbekiston Respublikasi Turizm qo‘mitasi raisi A. Aqqulov boshchiligidagi respublika ishchi guruhi Farg‘ona viloyatiga tashrif buyurib, hududda turizm sohasini rivojlantirish bo‘yicha amalga oshirilayotgan ishlar bilan tanishdi.
O‘zbekiston Respublikasi Prezidenti Administratsiyasi topshirig‘iga muvofiq tashkil etilgan tashrif doirasida viloyat hokimligi, tegishli idoralar hamda turizm sohasida faoliyat yuritayotgan 45 nafardan ortiq mahalliy tadbirkorlar ishtirokida ochiq muloqot o‘tkazildi. Uchrashuvda turoperatorlar, mehmonxonalar, umumiy ovqatlanish obyektlari, transport xizmatlari ko‘rsatuvchi tashkilotlar, dam olish maskanlari va madaniy muassasalar vakillari qatnashdi.
Muloqot davomida viloyatda 2025-yilda turizm sohasida amalga oshirilgan loyihalar, erishilgan natijalar hamda sohaning hozirgi holati yuzasidan ma’lumot berildi. Shuningdek, 2026–2027-yillarga mo‘ljallangan ustuvor yo‘nalishlar — turizm infratuzilmasini rivojlantirish, yangi turizm mahsulotlari va yo‘nalishlarini yaratish, sayyohlar oqimini oshirish hamda xususiy tadbirkorlikni qo‘llab-quvvatlash masalalari muhokama qilindi.
Tashrif davomida Turizm qo‘mitasi raisi hududda amalga oshirilayotgan investitsiya loyihalari, yangi turizm yo‘nalishlari hamda xizmatlar sifatini oshirishga qaratilgan ishlar bilan ham tanishdi.
Viloyat hokimi o‘rinbosari X. Axmedov hududda zamonaviy mehmonxonalar va dam olish maskanlari barpo etilayotgani, shuningdek ziyorat turizmini rivojlantirish bo‘yicha olib borilayotgan chora-tadbirlar haqida ma’lumot berdi.
Uchrashuv yakunida tadbirkorlar tomonidan bildirilgan taklif va tashabbuslar asosida viloyatda turizmni rivojlantirishga qaratilgan istiqbolli loyihalar bo‘yicha manzilli reja shakllantirildi. Mutasaddilarga mavjud muammolarni o‘rganish va ularni bartaraf etish yuzasidan tegishli tavsiyalar berildi.
Mutaxassislar fikricha, mazkur tashabbuslarning amalga oshirilishi viloyatning turistik jozibadorligini oshirish, yangi ish o‘rinlari yaratish hamda hudud iqtisodiy faolligini kuchaytirishga xizmat qiladi.
