Namanganda alimentdan qarzdor ota nonvoyxonadan topildi
Shundan so‘ng u tegishli tartibda ushlanib, keyingi protsessual choralar ko‘rish uchun masʼul bo‘limga olib ketilgan.
Namangan viloyatining Mingbuloq tumanida aliment to‘lashdan bo‘yin tovlab yurgan va qidiruvga berilgan ota nonvoyxonadan topildi. Bu haqida MIB axborot xizmati Zamon.uz‘ga maʼlum qildi.
Qayd etilishicha, Namangan viloyatida o‘tkazilayotgan navbatdagi reyd tadbiri davomida kutilmagan holat aniqlangan. Majburiy ijro byurosi inspektorlari hududdagi tekshiruv ishlaridan so‘ng non xarid qilish uchun nonvoyxonaga kirishgan.
Shu payt nonvoyxonada ishlab yurgan fuqarolardan biri xodimlarni ko‘rib, o‘zini olib qochishga uringani inspektorlar eʼtiborini tortadi. Shubha uyg‘otgan mazkur shaxs bilan suhbatlashilib, uning pasport maʼlumotlari xizmat plansheti orqali tekshirilganda, u aliment to‘lovlaridan qarzdor ekani maʼlum bo‘lgan.
Maʼlumotlarga ko‘ra, ushbu fuqaroga nisbatan Byuroning Mingbuloq tuman bo‘limi tomonidan qidiruv eʼlon qilingan ekani ham aniqlangan.
Natijada qidiruvda bo‘lgan shaxs tegishli tartibda ushlanib, keyingi protsessual choralar ko‘rish uchun masʼul bo‘limga olib ketilgan.
