Qatarda qolib ketgan o‘zbekistonliklarning so‘nggi guruhi vatanga qaytdi
96 nafar fuqaro Dohadan Dubay orqali Toshkentga olib kelindi.
Qatar havo hududining yopilishi sabab u yerda qolib ketgan o‘zbekistonlik fuqarolarning so‘nggi guruhi vatanga qaytdi. Evakuatsiya jarayoni O‘zbekistonning Qatardagi elchixonasi tomonidan tashkil etilgan. Bu haqda Dunyo axborot agentligi xabar berdi.
Dunyo axborot agentligi xabariga ko‘ra, 13–14-mart kunlari 96 nafar fuqaro Doha shahridan Dubayga avtobus orqali borgan va u yerdan Toshkentga samolyotda uchib kelgan. Diplomatik missiya xodimlari avtobus xavfsizligini ta’minlash maqsadida uni chegaragacha kuzatib borishgan.
Ma’lum qilinishicha, evakuatsiya jarayonida Qatardan jami 548 nafar O‘zbekiston fuqarosi, jumladan sayyohlar, talabalar hamda vaqtinchalik ish faoliyati bilan kelgan shaxslar olib chiqilgan.
Qayd etilishicha, evakuatsiya zarurati Qatar 28-fevral kuni Isroil, AQSh va Eron o‘rtasidagi qurolli to‘qnashuvlar sabab o‘z havo hududini yopganidan so‘ng yuzaga kelgan. Natijada Hamad xalqaro aeroporti faoliyati vaqtincha to‘xtatilgan va taxminan 2000 ga yaqin reys bekor qilingan.
