Samarqandda SSSR pasporti bilan yashab kelgan ayolga ID karta berildi
U uzoq vaqt e’tiborsizlik va oilaviy sharoit sabab hujjatlarini rasmiylashtirmagan.
Adliya vazirligi Samarqand viloyatida uzoq yillar davomida sobiq SSSR pasporti bilan yashab kelgan fuqaroga O‘zbekiston fuqarosining ID kartasi rasmiylashtirib berilganini ma’lum qildi.
Ma’lum qilinishicha, 1972-yil 21-dekabrda Nurota tumanida tug‘ilgan Kubayeva Onarxol Xoldorovna Qo‘shrabot tumanining “Quvkalla” mahallasida istiqomat qilib kelgan. U 1992-yilda Payariq tumanining “Nakurt” mahallasiga kelin bo‘lib tushgan.
Aniqlanishicha, fuqaro uzoq vaqt davomida e’tiborsizlik hamda oilaviy sharoitlarning yetarli darajada bo‘lmagani sababli sobiq SSSR pasporti bilan yashab kelgan. Shu bilan birga, u ushbu masala yuzasidan mahalla fuqarolar yig‘ini, ichki ishlar organlari yoki FHDY bo‘limlariga murojaat qilmagan.
Masala Samarqand viloyati adliya boshqarmasi tomonidan o‘rganilib, muammoni hal etish yuzasidan zarur choralar ko‘rildi. Qo‘shrabot va Payariq tumanlari adliya bo‘limlari hamda Payariq tumani IIB Migratsiya va fuqarolikni rasmiylashtirish bo‘limi hamkorligida fuqaroning hujjatlari rasmiylashtirildi.
Natijada 2026-yil 14-mart kuni Kubayeva Onarxol Xoldorovnaga O‘zbekiston Respublikasi fuqarosining ID kartasi topshirilgan.
Adliya vazirligi fuqarolarning huquq va qonuniy manfaatlarini ta’minlash, jumladan, shaxsni tasdiqlovchi hujjatlarni rasmiylashtirish bilan bog‘liq masalalarda amaliy yordam ko‘rsatish ishlari davom ettirilishini ma’lum qildi.
