Surxondaryoda erkak mavjud bo‘lmagan Cobalt avtomobilini 14 kishiga sotdi
U xaridorlardan yangi shinalar qo‘yish uchun oldindan to‘lov qilishni so‘ragan. Pullarni olgach, yozishmalarni o‘chirib yuborgan.
Surxondaryoda 27 yoshli yigit soxta Telegram profili orqali mavjud bo‘lmagan Cobalt avtomobilini sotib, 14 kishidan pul olgani aniqlandi. Bu haqda Surxondaryo IIB xabar berdi.
Qumqo‘rg‘on tumanida yashovchi yigit Telegram’da soxta profil ochib, turli guruhlarda Cobalt avtomobili sotiladi degan e’lonlar joylashtirgan. Mashinani bozor bahosidan past ko‘rsatib, xaridorlarni jalb qilgan. U xaridorlardan mashinaga yangi shinalar qo‘yish uchun oldindan to‘lov olishni so‘ragan va pullarni olgach, yozishmalarni o‘chirib yuborgan.
Tergov davomida, gumonlanuvchi viloyatning Oltinsoy tumanidagi 3 nafar fuqaroga jami 8 million so‘mdan ortiq zarar yetkazgani aniqlangan. Umumiy hisobda u 14 nafar fuqaroning mablag‘larini o‘zlashtirgan.
Hozirda unga nisbatan Jinoyat kodeksining 168-moddasi 3-qismi (firibgarlik) bo‘yicha jinoyat ishi qo‘zg‘atilgan va qamoqqa olish ehtiyot choralari qo‘llangan.
