Toshkent aeroportida tillani ichki a’zolariga yashirgan yo‘lovchilar ushlandi
Ular shu tariqa 410 gramm zargarlik buyumlarini Istanbulga olib chiqib ketishga uringan.
Toshkent xalqaro aeroportida Istanbulga uchmoqchi bo‘lgan ikki ayol 410 gramm og‘irlikdagi oltin taqinchoqlarni tanasiga yashirib olib chiqishga uringan vaqtida fosh etildi. Bu haqda Bojxona qo‘mitasi xabar berdi.
Ma’lum qilinishicha, ayollardan biri 252 gramm, ikkinchisi esa 158 gramm og‘irlikdagi oltin taqinchoqlarni jinsiy a’zosiga yashirgan holda mamlakatdan olib chiqishga uringan.
Bundan tashqari, ularning qo‘l sumkalarida bojxona nazoratiga taqdim etilmagan yana 64 gramm zargarlik buyumlari ham borligi ma’lum bo‘lgan.
Dastlabki hisob-kitoblarga ko‘ra, aniqlangan zargarlik buyumlarining umumiy qiymati qariyb 720 million so‘mni tashkil etgan.
Shuningdek, yo‘lovchilar zargarlik buyumlari o‘zlariga tegishli emasligi haqida ma’lum qilishgan.
“U holda salkam 60 ming AQSH dollari qiymatidagi zargarlik buyumlarining haqiqiy egalari oldidagi qarzni endi qanday uzishadi? Guvohi bo‘lganingizdek, bir muammo, boshqasini yetaklab kelaveradi?”, deyiladi qo‘mita xabarida.
