Toshkent va Farg‘onada 8 kilogrammga yaqin gashishning tarqalishi to‘xtatib qolindi
Sirdaryodan noqonuniy suzib o‘tgan shaxs va yana bir necha fuqaro qo‘lga olindi.
Toshkent va Farg‘ona viloyatlarida o‘tkazilgan tezkor tadbirlar davomida narkotik moddalar tarqalishining oldi olindi. Bu haqda DXX Zamon.uz’ga ma’lum qildi.
Ma’lum qilinishicha, Tojikistondan Sirdaryo daryosi orqali davlat chegarasini noqonuniy kesib o‘tgan Bekobodda yashovchi fuqaroning yonidan 5 kg 31 gramm gashish moddasi aniqlanib, protsessual tartibda rasmiylashtirib olingan.
Yana bir holatda DXXning Toshkent viloyati bo‘yicha boshqarmasi va bojxona organlari hamkorligida poytaxtdagi xususiy tibbiyot klinikalaridan birida tekshiruv o‘tkazildi. Holislar ishtirokida ko‘zdan kechirilgan xonada davolanayotgan shaxsga tegishli 1 kg 367 gramm gashish moddasi borligi ma’lum bo‘ldi.
Shuningdek, tezkor tadbirlar davomida Farg‘ona tumanida yashovchi, 1998-yilda tug‘ilgan shaxs qo‘lga olindi. U jinoiy sherigi tomonidan yashirin joyga qoldirib ketilgan 1 kg 21 gramm gashishni olayotgan vaqtida ushlangan. Uning yashash xonadonidan yana 2 gramm opiy ham ashyoviy dalil sifatida olingan. Tezkor choralar natijasida mazkur ish bo‘yicha uning sherigi — Farg‘ona shahrida yashovchi yana bir fuqaro ham qo‘lga olingan.
Yana bir tezkor tadbirda Farg‘ona viloyatining Qo‘shtepa tumanida yashovchi fuqaro Nexia rusumli avtomobilida Marg‘ilon hududida harakatlanayotganda mashinadan 996 gramm gashishni uloqtirib, voqea joyidan qochishga uringanda ushlangan.
Mazkur holatlar yuzasidan gumonlanuvchilarga nisbatan jinoyat ishlari qo‘zg‘atilib, ularga “qamoq” ehtiyot chorasi qo‘llanildi. Hozirda tergov harakatlari davom etmoqda.
