AQSh fuqaroligidan chiqish to‘lovi 80 foizga kamaytirildi
To‘lov 2015-yilda arizalar sonining keskin oshishi sabab 2350 dollargacha ko‘tarilgan edi.
AQShning AQSh Davlat departamenti qaroriga ko‘ra, fuqarolikdan rasman voz kechish uchun undiriladigan konsullik to‘lovi qariyb 80 foizga kamaytirildi. Bu haqda Newsmax va Associated Press xabar berdi.
Yangi tartibga muvofiq, fuqarolikdan chiqish uchun barcha hujjatlarni rasmiylashtirish qiymati 450 dollar etib belgilandi. Mazkur o‘zgarish juma kunidan kuchga kirgan.
Eslatib o‘tilishicha, ushbu to‘lov 2015-yilda keskin oshirilgan edi. O‘sha paytda fuqarolikdan voz kechish uchun to‘lov 450 dollardan 2350 dollargacha ko‘tarilgan. Bu qaror chet elda yashayotgan amerikaliklarning arizalari keskin ko‘paygani hamda konsullik xizmatlari xarajatlarini qoplash zarurati bilan izohlangan.
Mutaxassislarning ta’kidlashicha, arizalar sonining ortishiga chet elda yashovchi AQSh fuqarolari uchun soliq hisobotlari bo‘yicha yangi talablar joriy etilgani sabab bo‘lgan.
To‘lovning yuqoriligi ko‘plab amerikalik muhojirlar va jamoat tashkilotlari tomonidan tanqid qilingan. Xususan, Fransiyada joylashgan Association of Accidental Americans tashkiloti ushbu to‘lovni konstitutsiyaga zid deb hisoblab, sudga murojaat qilgan.
Tashkilot prezidenti Fabien Lehagre bu qarorni “fuqarolikdan voz kechish huquqini barcha uchun ochiq qilish yo‘lidagi muhim g‘alaba” deb baholagan.
Tashkilot ma’lumotlariga ko‘ra, 2023-yilda to‘lov kamaytirilganidan so‘ng qariyb 9 ming kishi AQSh fuqaroligidan voz kechgan.
