Eronga qarshi operatsiya bir necha hafta ichida tugashi mumkin
AQSh Energetika vaziri mojaro tez orada yakunlanishi kutilayotganini ma'lum qildi.
AQSh energetika vaziri Eronga qarshi olib borilayotgan harbiy operatsiya bir necha hafta ichida yakunlanishi mumkinligini ma’lum qildi. Bu haqda u ABC News telekanaliga bergan intervyusida aytib o‘tgan.
Vazirning ta’kidlashicha, mojaro tez orada yakunlanishi kutilmoqda.
“Menimcha, mojaro kelgusi haftalarda albatta tugaydi. Bu hatto undan ham tezroq sodir bo‘lishi mumkin, biroq umumiy hisobda operatsiya yaqin bir necha hafta ichida yakunlanishi kerak”, — degan vazir.
Uning qo‘shimcha qilishicha, ushbu davr ichida amerikaliklar energiya bozoridagi o‘zgarishlarni, jumladan yoqilg‘i narxlarining pasayishini kutishlari mumkin. Biroq vazir bunday natija yuz berishiga kafolat yo‘qligini ham ta’kidlagan.
“Urushda hech qanday kafolat bo‘lmaydi. Ba’zan yaxshi natijaga erishish uchun qisqa muddatli qiyinchiliklarga chidashga to‘g‘ri keladi”, — deya izoh bergan vazir.
Shu bilan birga, Isroil Mudofaa Kuchlari (IDF) rasmiy vakili Effie Defrin CNN telekanaliga bergan intervyusida Isroil harbiylari Eronga qarshi operatsiyalarni kamida uch hafta davom ettirishni rejalashtirayotganini ma’lum qilgan.
