“INSON” filmining ikkinchi soni premyerasi bo‘lib o‘tadi
Yangi film Qoraqalpog‘istondan bo‘lgan yetim va ota-ona qaramog‘idan mahrum uch nafar bolaning hayoti haqida hikoya qiladi.
Ijtimoiy himoya milliy agentligi tomonidan an’anaviy tarzda amalga oshirib kelinayotgan “INSON” loyihasi doirasida filmning ikkinchi soni premyerasi o‘tkaziladi.
Ma’lum qilinishicha, 2025-yilda mazkur filmning ilk soni namoyish etilgan bo‘lib, unda Namangan viloyatida yashovchi nogironligi bo‘lgan shaxsning hayotiy sinovlarga qaramay namoyon etgan jasorati va matonati asosida ta’sirli hikoya tasvirlangan edi. Film “Ikki taqdir, bir makon: o‘xshash og‘riqlar, sinovlarda yengilmagan insonlar. Baxt o‘z maqsadini unutmay harakat qilganlarni sevadi” g‘oyasi asosida yaratilgan.
Yangi son qahramonlari esa Qoraqalpog‘iston Respublikasidan bo‘lgan, yetim hamda ota-ona qaramog‘idan mahrum bo‘lgan uch nafar bola hisoblanadi. Ularning hayotida “Inson” ijtimoiy xizmatlar markazi va mahallalarda faoliyat yuritayotgan ijtimoiy xodimlar tomonidan ko‘rsatilgan ijtimoiy xizmatlar muhim ijobiy o‘zgarishlarga sabab bo‘lgani filmda yoritiladi.
Kartinada bolalarning mehribonlik uyida tarbiyalanib, keyinchalik kichik hajmdagi oilaviy bolalar uylarida ulg‘aygani, ularning hayot yo‘li, orzu-intilishlari va kelajak sari intilishi ta’sirli tarzda namoyish etilgan.
Shuningdek, 2025-yil 1–2-may kunlari O‘zekspomarkaz milliy ko‘rgazmalar majmuasida agentlik tomonidan har yili an’anaviy tarzda tashkil etiladigan “Inson uchun” savdo-ko‘rgazmasi o‘tkazilgan edi.
Unda nogironligi bo‘lgan shaxslarni ish bilan ta’minlagan tadbirkorlik subyektlari tomonidan ishlab chiqarilgan mahsulotlar namoyish etilgan.
Ko‘rgazma doirasida “Muvaffaqiyatlar tarixi” loyihasi ham ilk bor taqdim etilib, ijtimoiy va psixologik yordam, reabilitatsiya, kasbga tayyorlash hamda bandlik orqali jamiyatda o‘z o‘rnini topgan insonlarning ilhomlantiruvchi hayot yo‘llari haqida hikoyalar namoyish qilingan. Tadbir davomida Orazbayev Murat, Uzaqbergenov Berdaq va Yerimbetov Abdulaziz ijrosida “Inson” qo‘shig‘ining premyerasi ham bo‘lib o‘tgan.
“INSON” filmining ikkinchi soni oddiy insonlarning hayoti, his-tuyg‘ulari, qiyinchiliklari va yutuqlari haqida hikoya qiluvchi ta’sirli kartina hisoblanadi. Filmda mehr-oqibat, qo‘llab-quvvatlash va ichki kuch orqali inson qadr-qimmati qanday namoyon bo‘lishi ochib beriladi.
Kartina real voqealar asosida yaratilgan bo‘lib, unda og‘ir sinovlarni boshdan kechirgan, ammo taslim bo‘lmay hayotda o‘z yo‘lini topishga intilayotgan yetim hamda ota-ona qaramog‘idan mahrum bo‘lgan bolalar taqdiri yoritiladi. Filmning o‘ziga xos jihati shundaki, unda aktyor sifatida aynan shu voqealarni boshidan o‘tkazgan insonlarning o‘zi ishtirok etadi.
