Isroilning havo hujumiga qarshi raketa zaxirasi kamaymoqda

Semafor nashri xabar berishicha, Isroil rasmiylari AQShga Eron bilan ehtimoliy urush sharoitida ballistik raketalarni tutib qoluvchi tizimlar zaxirasi kamayib borayotganini ma’lum qilgan.

 

Manbalarga ko‘ra, mojaro boshlanishi arafasidayoq Isroilning bunday vositalar zaxirasi cheklangan bo‘lgan. Bunga 2025-yilda yuz bergan 12 kunlik Eron–Isroil urushi davomida tutib qoluvchi raketalar qisman sarflangani sabab bo‘lgan.

 

Shuningdek, CNN ma’lumotlariga ko‘ra, Eron raketalarga kassetali o‘q-dorilar qo‘shishni boshlagani Isroil mudofaa tizimlariga tushayotgan yuklamani yanada oshirishi mumkin.

 

AQSh rasmiylari Isroilning bu muammosidan bir necha oydan beri xabardor ekanini bildirgan. Amerikalik amaldorlardan biri bu holat kutilganini ta’kidlab, Vashingtonda bunday tutqichlar taqchilligi kuzatilmayotganini qayd etgan.

 

Xabarda aytilishicha, Isroil zarur bo‘lsa qiruvchi samolyotlardan ham foydalanishi mumkin, biroq uzoq masofali raketalarga qarshi kurashishda tutib qoluvchi raketalar eng samarali vosita hisoblanadi.

 

Ma’lumotlarga ko‘ra, 2025-yil iyun oyida AQSh Eron bilan 12 kunlik urush davomida 150 dan ortiq THAAD tutqichlarini joylashtirgan bo‘lib, bu o‘sha paytdagi AQSh zaxirasining qariyb chorak qismini tashkil etgan. Shuningdek, urushning dastlabki besh kunida qiymati qariyb 2,4 milliard dollar bo‘lgan Patriot raketa tutqichlari ham ishga tushirilgani ma’lum qilingan.

 

Oq uy matbuot kotibi Karoline Leavittning ta’kidlashicha, AQSh zaxiralari Donald Tramp ma’muriyatining Eron bo‘yicha strategik maqsadlarini amalga oshirish uchun “yetarli darajadan ham ortiq”.

 

Shu bilan birga, Reuters manbalariga ko‘ra, Yaqin Sharq davlatlari urushni to‘xtatish bo‘yicha muzokaralarni boshlashga urinayotgan bo‘lsa-da, Vashington hozircha bunday tashabbuslarga qiziqish bildirmagan. Muzokaralar uchun vositachilik qilishga harakat qilayotgan davlatlardan biri sifatida Ummon tilga olinmoqda.