Mujtabo Xomanaiy davolanish uchun Moskvaga olib ketilgan
U 28-fevral kuni Eronga qilingan havo hujumlari vaqtida jarohat olgan.
Eronning yangi Oliy rahbari Mujtabo Xomanaiy sog‘lig‘i bilan bog‘liq muammolar sabab Rossiya poytaxti Moskvaga yashirin tarzda olib ketilgani haqida xabarlar tarqaldi. Bu haqda Al‑Jarida nashri rahbariyatga yaqin manbaga tayanib ma’lum qilgan.
Nashr ma’lumotlariga ko‘ra, Xomanaiy Rossiya harbiy samolyoti orqali Moskvaga olib kelingan va u yerda jarrohlik amaliyotini boshdan kechirgan.
Hozirda u Rossiya prezidenti qarorgohlaridan biridagi xususiy klinikalardan birida davolanayotgani aytilmoqda.
Manbaning bildirishicha, Mujtaba Xomanaiy 28-fevral kuni Eronga qilingan dastlabki havo hujumlari vaqtida jarohat olgan. Davom etayotgan hujumlar sabab mamlakat ichida davolanish jarayoni murakkablashgani bois uni Moskvaga olib borish to‘g‘risida qaror qabul qilingan.
Xabarga ko‘ra, Vladimir Putin avvalroq Mas’ud Pezeshkian bilan telefon orqali muloqot chog‘ida Xomanaiyning Rossiyada davolanishini tashkil etishni taklif qilgan. Eron rasmiylari ushbu taklifni ko‘rib chiqib, uni ma’qullagan.
