Toshkentda Lacetti va Matiz to‘qnashuvi oqibatida bir kishi halok bo‘ldi
Holat yuzasidan jinoyat ishi qo‘zg‘atilib, tergov olib borilmoqda.
Toshkent shahrida sodir bo‘lgan yo‘l-transport hodisasi oqibatida bir kishi vafot etdi. Bu haqda Toshkent shahar IIBB Yo‘l harakati xavfsizligi xizmati xabar berdi.
Ma’lum qilinishicha, 15-mart kuni taxminan soat 05:00 larda Olmazor tumani hududidagi Sebzor–Nurafshon ko‘chalari chorrahasida Chevrolet Lacetti hamda Daewoo Matiz rusumli avtomobillar o‘rtasida to‘qnashuv sodir bo‘lgan.
Yo‘l-transport hodisasi oqibatida Matiz avtomobili haydovchisi og‘ir tan jarohatlari bilan shifoxonaga olib borilgan. Shifokorlarning ko‘rsatgan yordamiga qaramay, u shifoxonada vafot etgan.
Mazkur holat yuzasidan Toshkent shahar IIBB Tergov boshqarmasi tomonidan O‘zbekiston Respublikasi Jinoyat kodeksining 266-moddasi 2-qismi bilan jinoyat ishi qo‘zg‘atilib, hozirda dastlabki tergov harakatlari olib borilmoqda.
