Aholi 16–31 mart kunlari yana 50 kub metr gazga arzonlashtirilgan narxda to‘lov qiladi
Mazkur 50 kub metr gaz uchun ham iste’molchilar bazaviy me’yor doirasidagi narxda, ya’ni 1800 so‘m emas, 1000 so‘mdan to‘lov amalga oshiradi.
16-martdan boshlab aholi iste’molchilari oy oxirigacha qo‘shimcha 50 kub metr tabiiy gaz uchun bazaviy me’yor doirasidagi narxda to‘lov amalga oshiradi. Bu haqda O‘zbekiston Energetika vazirligi ma’lum qildi.
Avvalroq mart oyining boshida respublika hududlarida havo haroratining keskin sovib ketgani sabab tabiiy gaz uchun isitish mavsumida belgilangan oylik bazaviy me’yor 15-martga qadar uzaytirilgani haqida xabar berilgandi.
O‘zgidromet ma’lumotiga ko‘ra, 16–20-mart kunlari respublika hududlarida havo harorati kunduzi +22°C gacha, kechasi esa +10°C atrofida bo‘lishi kutilmoqda. Shu munosabat bilan 16-martdan 1-noyabrga qadar har oy uchun 100 kub metrgacha tabiiy gaz iste’moli uchun bazaviy me’yor amal qiladi. Qoraqalpog‘iston Respublikasi va Xorazm viloyatida esa bu tartib 1-oktyabrgacha davom etadi.
Mart oyi uchun hisob-kitoblarga ko‘ra, bir oylik 500 kub metr bazaviy me’yor oyning birinchi yarmi — 1–15 mart kunlari uchun teng ulushlarda taqsimlanganda 250 kub metrni tashkil etadi. Oyning ikkinchi yarmi — 16–31 mart kunlari uchun esa bir oylik 100 kub metr bazaviy me’yor proporsional taqsimlanganda 50 kub metrga teng bo‘ladi.
Mazkur 50 kub metr gaz uchun ham aholi iste’molchilari bazaviy me’yor doirasidagi narxda, ya’ni 1800 so‘m emas, 1000 so‘mdan to‘lov amalga oshiradi.
Shuningdek, tabiiy gaz iste’moli bo‘yicha hisob-kitoblarga oid murojaatlar yuzasidan Hududgazta’minot AJ va uning hududiy filiallari tomonidan tushuntirishlar berilishi bildirilgan.
Qayd etilishicha, O‘zbekiston Prezidenti qaroriga muvofiq ehtiyojmand oilalarga elektr energiyasi va tabiiy gaz uchun davlat tomonidan har oy kompensatsiya ajratilishi davom etmoqda.
Qarorga ko‘ra, kompensatsiya miqdori elektr energiyasi uchun oyiga bazaviy me’yordan ortiq — 200 kVt·soatdan keyingi 150 kVt·soatgacha bo‘lgan qismni, tabiiy gaz uchun esa qish oylarida 250 kub metrgacha, boshqa oylarda 150 kub metrgacha bazaviy me’yordan ortiq foydalanilgan hajmni qoplaydi.
Avval kompensatsiyalar faqat qish mavsumida berilgan bo‘lsa, endilikda ular yil davomida har oyda taqdim etilmoqda.
