Andijonda 5 kishi ayolni samosud qilib, sochini olib tashladi
Samosud qilgan shaxslar qo‘lga olinib, jinoyat ishi qo‘zg‘atildi.
Andijon viloyatida bir ayolni majburan avtomobilga o‘tkazib, ovloq joyga olib borib sochini olib tashlagan besh nafar shaxsga nisbatan jinoyat ishi qo‘zg‘atildi. Bu haqda Andijon viloyati IIB ma’lum qildi.
Dastlabki ma’lumotlarga ko‘ra, 1991-yilda Izboskan tumanida tug‘ilgan va hozirda Andijon shahrida yashovchi ayol 1998-yilda tug‘ilgan boshqa bir ayolni turmush o‘rtog‘i bilan ishqiy munosabatda bo‘lganlikda ayblab, undan qasos olishni rejalashtirgan.
2025-yil 23-dekabr kuni u davolanib yotgan shifoxonaga 1995, 2004 va 2001-yillarda tug‘ilgan tanish ayollari orqali jabrlanuvchini olib kelgan. Shifoxonada ayolga nisbatan turli nojo‘ya harakatlar sodir etilib, u tahqirlangan hamda bu jarayon videoga olingan.
Shundan so‘ng gumonlanuvchi ayol o‘zining tanishlari — 1999 va 1998-yillarda tug‘ilgan ikki nafar erkakni chaqirib, jabrlanuvchini ovloq joyga olib borib sochlarini olib tashlashni buyurgan. Natijada ayol oq rangli Gentra avtomobiliga majburan o‘tkazilib, Andijon tumani Jevachi mahallasi hududidagi xilvat joyga olib borilgan. U yerda 1999-yilda tug‘ilgan erkak tomonidan uning sochlari mashinka yordamida olib tashlangan.
Mazkur jarayon 1995-yilda tug‘ilgan ayol tomonidan videoga olingan va keyinchalik ijtimoiy tarmoqlarga joylashtirilgan.
Holat yuzasidan Andijon shahri bo‘yicha Ichki ishlar organlari faoliyatini muvofiqlashtirish boshqarmasi huzuridagi tergov bo‘limi tomonidan Jinoyat kodeksining 137-moddasi 2-qismi “v” bandi bilan jinoyat ishi qo‘zg‘atilgan.
Gumonlanuvchi sifatida besh nafar shaxs protsessual tartibda ushlangan. Hozirda jinoyat ishi bo‘yicha dastlabki tergov harakatlari olib borilmoqda. Mazkur ish Andijon viloyati prokuraturasi tomonidan alohida nazoratga olingan.
