BAA havo hududining qisman yopilishi 23-martgacha uzaytirildi
Cheklovlar AQSH–Isroil va Eron o‘rtasidagi harbiy keskinlik fonida joriy etilgan.
Birlashgan Arab Amirliklari mamlakat havo hududining qisman yopilishi muddatini yana bir haftaga uzaytirdi. Bu haqda Yaqin Sharqdagi havo harakatini boshqarish xizmatlaridagi manbaga tayanib, TASS axborot agentligi xabar berdi.
Ma’lum qilinishicha, havo hududi 23-mart kuni mahalliy vaqt bilan soat 16:00 ga qadar qisman yopiq bo‘lib qoladi.
Qayd etilishicha, mahalliy aeroportlarga amalga oshiriladigan hamda u yerdan uchib ketadigan reyslar uchun oltita maxsus yo‘nalish belgilangan. Ushbu yo‘nalishlar qo‘shni Ummon va Saudiya Arabistoni havo hududi bilan chegaradagi nazorat-o‘tish punktlariga olib boradi.
Shuningdek, ekipajlarga havo harakatini boshqarish markazlari tomonidan berilayotgan tezkor ma’lumotlarni muntazam kuzatib borish bo‘yicha ko‘rsatma berilgan.
Mazkur cheklovlar AQSH va Isroilning Eronga qarshi olib borayotgan harbiy operatsiyalari hamda Tehronning bunga javoban Yaqin Sharqdagi Amerika harbiy bazalariga uyushtirayotgan hujumlari fonida joriy etilgan.
Avvalroq BAA havo hududi qisman yopilgani sababli 16-mart kuni Toshkentdan Dubayga amalga oshirilgan ayrim reyslar ortga qaytarilgani haqida xabar berilgandi.
