Bo‘ka tumanida soliq inspektori pora olayotgan vaqtida ushlandi
Bo‘ka tumanida soliq inspektori pora olayotgan vaqtida ushlandi.
Toshkent viloyatining Bo‘ka tumanida soliq organi xodimi pora olish bilan bog‘liq jinoyatda gumonlanib qo‘lga olindi. Bu haqda huquqni muhofaza qiluvchi organlar ma’lum qildi.
Ma’lum qilinishicha, tuman soliq inspeksiyasining bosh inspektori paxta va g‘alla yetishtirishga ixtisoslashgan fermer xo‘jaligi rahbarining ishonchiga kirib, xo‘jalikning soliq organlari oldidagi 165,6 mln so‘m miqdoridagi qarzdorligini to‘lash muddatini viloyat soliq boshqarmasidagi tanishlari orqali uzaytirib berishni va’da qilgan. Buning evaziga u fermerdan 10 mln so‘m talab qilgan.
Davlat xavfsizlik xizmati hamda Bosh prokuratura huzuridagi Departament xodimlari hamkorligida o‘tkazilgan tezkor tadbirda bosh inspektor so‘ralgan pulni xizmat xonasida olayotgan vaqtida ashyoviy dalillar bilan ushlandi.
Holat yuzasidan unga nisbatan Jinoyat kodeksining 168-moddasi 3-qismi “v” bandi hamda 28,211-moddasi 1-qismi bilan jinoyat ishi qo‘zg‘atilib, “qamoq” ehtiyot chorasi qo‘llangan. Hozirda tergov harakatlari davom etmoqda.
Shuningdek, fuqarolar bunday qonunbuzilish holatlariga duch kelsa, Davlat xavfsizlik xizmatining 1520 qisqa raqamiga murojaat qilishi mumkinligi eslatildi. Shaxsiy ma’lumotlar sir saqlanishi kafolatlanadi.
