IJQKD katta tezkor vakili 85 million so‘m pora bilan qo‘lga olindi
Katta tezkor vakil tadbirkorga elektron doskalarni davlat maktabiga tannarxidan qimmatga sotib berishni va’da qilgan.
Jizzax viloyatida Iqtisodiy jinoyatlarga qarshi kurashish departamentining Paxtakor tuman bo‘limi katta tezkor vakili davlat manfaatiga qarshi jinoyat qilganlikda ayblanib, qo‘lga olindi. Bu haqda DXX Zamon.uz’ga ma’lum qildi.
Ma’lumotlarga ko‘ra, ushbu tezkor vakil shaxsiy boylik orttirish maqsadida muqaddam sudlangan tanishi bilan hamkorlikda, texnika ta’minoti bilan shug‘ullanuvchi MCHJ rahbari ishonchini qozongan. Ular Jizzax shahar Maktabgacha va maktab ta’limi bo‘limi bilan 20 ta interaktiv doskalarni qimmat narxda sotib olish bo‘yicha elektron shartnoma tuzishda "g‘oliblik"ni qo‘lga kiritishga va’da bergan.
Tergov harakatlari davomida aniqlanishicha, katta tezkor vakil interaktiv doskalarni haqiqiy narxi 15,2 mln so‘m bo‘lgani holda, 25 mln so‘mdan sotishga harakat qilgan. Shu tariqa, ular o‘z “xizmatlari” uchun 85 mln so‘m talab qilgan.
Davlat xavfsizlik xizmati xodimlari va prokuratura organlari bilan hamkorlikda o‘tkazilgan tezkor tadbirda tezkor vakilning tanishi 85 mln so‘mni olayotgan vaqtda ushlangan. Keyinroq, katta tezkor vakil va maktab direktori o‘z yashash xonadoni oldida tanishidan 30 mln so‘mni olgan vaqtida ashyoviy dalillar bilan qo‘lga olingan.
Hozirda Jizzax viloyati prokuraturasi tomonidan jinoyat ishi qo‘zg‘atilib, IJQKD Paxtakor tuman bo‘limi katta tezkor vakili hamda maktab direktoriga nisbatan “qamoq” ehtiyot chorasi qo‘llandi.
Tergov harakatlari davom etmoqda.
