Netanyahu tirik ekan Isroil doimo kimnidir dushman sifatida ko‘radi — Turkiya tashqi ishlar vaziri
Turkiya mamlakatni hech kim Yaqin Sharqdagi mojaroga torta olmasligini bildirdi.
Turkiya tashqi ishlar vaziri Hoqon Fidan Isroil bosh vaziri Benjamin Netanyahu hokimiyatda ekan, Isroil har doim kimnidir o‘ziga dushman sifatida ko‘rishini aytdi. Bu haqda The Wall Street Journal xabar bermoqda.
“Doim dushman "paydo qilish" unga o‘z siyosatini olg‘a surish uchun kerak. Isroil xavfsizlik ortidan emas, ko‘proq yer egallash ortidan quvmoqda. Netanyahu bu g‘oyadan voz kechmas ekan, Yaqin Sharqda doimo urush bo‘laveradi”, — dedi Fidan.
Uning so‘zlariga ko‘ra, Isroil mintaqada tashqi aralashuvlar orqali o‘z geosiyosiy manfaatlarini amalga oshirmoqda. Fidan Isroil hukumati G‘azodagi sulh kelishuvini buzishda davom etayotganini va u yerdagi gumanitar vaziyat kun sayin yomonlashayotganini qayd etdi.
Shuningdek, Fidan Netanyahu “Hizbulloh”ga qarshi kurash bahonasi bilan Livanda yangi qirg‘in sodir etishi mumkinligidan xavotirda ekanini bildirdi. U xalqaro hamjamiyatni Isroil tomonidan sodir etilayotgan jinoyatlarga qarshi zudlik bilan chora ko‘rishga chaqirdi.
Hoqon Fidanning ta’kidlashicha, Turkiya davom etayotgan adolatsiz urushda ishtirok etishni istamaydi va mamlakatni mojaroga jalb qilishga bo‘lgan har qanday urinishlarga qat’iy qarshi. Anqara provokatsiyalarga berilmaslikka qaror qilganini va mamlakatning harbiy hamda tiyib turish salohiyati juda yuqori ekanini bildirdi.
“Turkiya strategik jihatdan kuchini qachon va qayerda ishlatishni yaxshi biladi. Biroq urushni imkoni boricha tezroq diplomatik yo‘l bilan hal qilish zarur. Eronga qilingan hujumlar darhol to‘xtatilishi kerak, shuningdek, Eronning qo‘shni davlatlarga hujumlari ham to‘xtashi lozim. Shu bilan birga, tomonlar tez orada muzokaralarga qaytishi kerak”, — deya fikr bildirdi Turkiya TIV rahbari.
