Olmaliqda 3-mis boyitish fabrikasi ishga tushirilishi doirasida 6 mingdan ortiq ish o‘rinlari yaratiladi
Prezident Shavkat Mirziyoyev ishtirokida Olmaliq kon-metallurgiya kombinatida 3-mis boyitish fabrikasini ishga tushirish marosimi boshlandi.
Shavkat Mirziyoyev Olmaliq kon-metallurgiya kombinatida 3-mis boyitish fabrikasini ishga tushirish marosimida majmua to‘liq ishga tushirilgach, 6 mingdan ortiq yoshlar yuqori daromadli ish o‘rinlari bilan ta’minlanishini ma’lum qildi.
Ma’lumotlarga ko‘ra, 3-mis boyitish fabrikasi to‘liq ishga tushirilgach, Olmaliq kon-metallurgiya kombinatida mis konsentratining kunlik ishlab chiqarish hajmi hozirgi 2 ming 400 tonnadan 5 ming tonnagacha oshadi.
Marosimda mazkur loyiha shunchaki korxona emas, balki mamlakat sanoat qudratini yanada mustahkamlaydigan, tabiiy boyliklarni chuqur qayta ishlashga xizmat qiladigan zamonaviy industrial majmua ekani ta’kidlandi.
Qayd etilishicha, “Yoshlik-1” va “Qalmoqqir” konlarida jami 45 million tonna mis hamda 5 ming tonnadan ortiq oltin zaxirasi mavjud bo‘lib, ushbu zaxiralar mamlakat sanoatini kamida 100 yil davomida xomashyo bilan ta’minlaydigan kafolatli baza hisoblanadi.
Shuningdek, konlarda mavjud molibden, selen, tellur va reniy kabi noyob metallar yangi innovatsion yo‘nalishlardagi loyihalarni rivojlantirish uchun muhim asos bo‘lib xizmat qilishi aytildi.
Bundan tashqari, fabrikada AQSh, Germaniya, Rossiya, Xitoy va Finlyandiyaning tog‘-kon sanoatidagi ilg‘or texnologiyalari joriy etilmoqda. Barcha texnologik jarayonlar raqamlashtirilib, sun’iy intellekt asosida yagona boshqaruv tizimiga ulanadi.
Mutaxassislar ushbu tizimlar joriy etilishi natijasida energiya sarfi 10 foizga, mahsulot tannarxi 15 foizga kamayib, mehnat unumdorligi esa 10 foizga oshishini bildirdi.
