Oltin qazib olish hajmi 118,4 tonnaga yetkazildi
Konlarni investorlarga berish bo‘yicha shaffof tizim yaratilgani natijasida so‘nggi to‘qqiz yil ichida sohaga 10 milliard dollar xorijiy investitsiya jalb etilgan.
So‘nggi yillarda O‘zbekistonda tog‘-kon sanoati tubdan isloh qilinib, sohada investitsiyalar hajmi va ishlab chiqarish ko‘rsatkichlari sezilarli darajada oshgan. Bu haqda Shavkat Mirziyoyev Olmaliqdagi 3-mis fabrikasining ochilish marosimida ma’lum qildi.
Qayd etilishicha, avval qimmatbaho va rangli metallarni qazib olish bilan atigi ikki kombinat shug‘ullangan. Konlarni investorlarga berish bo‘yicha shaffof tizim yaratilgani natijasida esa so‘nggi to‘qqiz yil ichida sohaga 10 milliard dollar xorijiy investitsiya jalb etilgan. Hozirda tarmoqda 65 ta xususiy korxona faoliyat yuritmoqda.
Ma’lumotlarga ko‘ra, mustaqillikning dastlabki 25 yilida oltin qazib olish hajmi 63 tonnadan 87 tonnagacha, ya’ni 24 tonnaga oshgan. So‘nggi to‘qqiz yil ichida esa bu ko‘rsatkich yana 31 tonnaga ko‘payib, o‘tgan yili 118,4 tonnaga yetkazilgan.
Shuningdek, 2016-yildan buyon kumush ishlab chiqarish 1,6 barobar, uran 2,1 barobar, mis esa 1,4 barobar oshgan. Natijada sohada ishlab chiqarish hajmi 1,7 barobar o‘sib, o‘tgan yil yakuniga ko‘ra 270 trillion so‘mga yetgan.
Ta’kidlanishicha, eng yuqori daromadli ish o‘rinlari ham aynan shu tarmoq korxonalarida shakllangan. Bugungi kunda ekskavator mashinistlari 30 million so‘mgacha, burg‘ilash mutaxassislari va yirik samosval haydovchilari 40 million so‘mgacha, geolog hamda marksheyderlar esa 70 million so‘mgacha oylik maosh olmoqda.
