O‘zbekistonda 1765 ta masjidda Qur’on xatmonalari bo‘ladi
27 kun davomida o‘qilgan Qur’oni karim 16-mart kuni xatm qilinadi.
O‘zbekiston bo‘ylab 16- mart kuni 27 kun davomida Qur’oni Karim o‘qilgan masjidlarda xatmona marosimlari bo‘lib o‘tadi. Bu haqda Musulmonlar idorasi xabar berdi.
Ma’lum qilinishicha, Qadr kechasi arafasida, ya’ni Ramazon oyining 27-kunida mamlakat bo‘ylab 1765 ta masjidda Qur’on Karim xatm qilinadi. Xatmonadan so‘ng masjidlarda jamoaviy duolar o‘qiladi.
“Qur’on xatm qilinganidan so‘ng qilingan duo rad etilmaydi. Chunki Qur’on Allohning kalomi bo‘lib, uni to‘liq o‘qib tugatish ulug‘ ibodat”, deyiladi idora xabarida.
Shuningdek, Musulmonlar idorasi yurtdoshlarni masjidlarda o‘tkaziladigan xatmona marosimlarida ishtirok etishga chaqirgan.
