Qoraqalpog‘istonda “O‘zyo‘lko‘prik” xodimi pora bilan qo‘lga olindi
Xodim “Beruniy-To‘rtko‘l” magistral yo‘l qurilishi loyihasining bir qismini olib berish uchun tadbirkordan 10 ming dollar talab qilgan.
Qoraqalpog‘iston Respublikasida yo‘l qurilishi sohasida davlat mansabdori tomonidan noqonuniy harakatlar sodir etilgani aniqlandi. Bu haqda DXX Zamon.uz’ga ma’lum qildi.
Ma’lum qilinishicha, “O‘zyo‘lko‘prik” klasteri davlat muassasasi Qoraqalpog‘iston filiali xodimi xizmat mavqeidan foydalanib, “Beruniy-To‘rtko‘l” A380-sonli magistral yo‘l qurilishi loyihasining 5 kilometrlik ish hajmini olib berish evaziga qurilish faoliyati bilan shug‘ullanuvchi MCHJ rahbaridan 10 ming AQSH dollari talab qilgan.
Davlat xavfsizlik xizmati Qoraqalpog‘iston boshqarmasi xodimlari o‘tkazgan tezkor tadbirda ushbu mansabdor shaxs talab qilgan pulni olayotgan vaqtida ushlab, uning noqonuniy harakatlariga chek qo‘yilgan.
Hozirda unga nisbatan O‘zbekiston Jinoyat kodeksining 168-moddasi 3-qismi “v” bandi va 28, 211-moddasi 1-qismi bilan jinoyat ishi qo‘zg‘atilgan hamda tergov harakatlari olib borilmoqda.
