Rim papasi Eron bilan urush Xudo tomonidan qo‘llab-quvvatlanayotgani haqidagi fikrlarni tanqid qildi
Shuningdek, u tomonlarni o‘t ochishni to‘xtatib, mintaqadagi zo‘ravonlikka barham berishga chaqirdi.
Rim papasi Leo yakshanba kuni kengayib borayotgan Eron urushida darhol o‘t ochishni to‘xtatishga chaqirdi va urush chidab bo‘lmas zo‘ravonlikka sabab bo‘layotganini ta’kidladi. Bu haqda Reuters xabar berdi.
Papa minglab tinch aholi halok bo‘layotgani va mintaqa aholisi azob-uqubatlar ichida qolganini ham qayd etgan.
Avliyo Piter maydonidagi haftalik Angelus duo marosimida Rim papasi: “Yaqin Sharq xalqlari ikki haftadan beri urushning beayov zo‘ravonliklaridan azob chekmoqda. Mas’ul shaxslarga murojaat qilaman: darhol o‘t ochishni to‘xtating!” — dedi.
Papa Leo shuningdek, Livan vaziyatidan ham xavotir bildirib, urush muammolarni hal qilmasligini, aksincha tinchlik uchun doimiy muzokara zarurligini aytdi.
“Ba’zilar o‘zgalarni o‘ldirish qarorlarini oqlash uchun Xudoning nomidan foydalanyapti, ammo Xudo zulmat xizmatiga yollanmaydi. U har doim insoniyatga yorug‘lik, umid va tinchlik olib keladi,” — dedi papa.
Mazkur bayonot AQSh askarlariga urush “Xudoning ilohiy rejasining bir qismi” sifatida aytilayotgani haqida shikoyatlar paydo bo‘lganidan so‘ng berildi.
