Rossiyada Telegramni bloklash boshlandi
Rossiyaning turli hududlaridan messenjerning ishlamayotgani yuzasidan shikoyatlar kelib tushgan.
16-mart kuni ertalab Rossiyadagi Telegram foydalanuvchilari messenjer ishlashida muammolar yuzaga kelganini bildirishdi. Bu haqda Kommersant xabar bermoqda.
“Сбой рф” ma’lumotlariga ko‘ra, Moskva vaqti bilan soat 11:00 holatiga kun boshidan buyon Telegram faoliyatida yuzaga kelgan nosozliklar yuzasida 2,5 mingdan ortiq shikoyat kelib tushgan.
Detector404 xizmati esa bir sutka davomida 8 mingdan ortiq nosozliklar haqida xabar qayd etgan.
“Foydalanuvchilarning eng ko‘p bildirgan muammolari shuki, messenjerning hech bir versiyasi — web, desktop yoki mobil — ishlamayapti. Shikoyatlarning yarmidan ko‘pi Moskva va atrof hududlardan kelgan. Shuningdek, Sankt-Peterburg va Markaziy Rossiyaning boshqa hududlaridan ham nosozliklar haqida xabarlar tushgan”, deyiladi xabarda.
O‘tgan hafta Davlat Dumasi VPN xizmatlari Rossiyada yarim yil ichida bloklanishi mumkinligini bildirgan edi. Axborot siyosati qo‘mitasi raisi o‘rinbosari Andrey Svintsovning so‘zlariga ko‘ra, Roskomnadzorda bunday xizmatlar trafigini nazorat qilishning texnik imkoniyati mavjud, maxsus xizmatlarda esa ularni cheklash yoki bloklash vakolati bor.
Roskomnadzor Svintsovning “tez orada Telegram VPN orqali ham ishlamay qolishi mumkin” degan fikriga izoh berishdan bosh tortgan.
“Ъ FM” so‘roviga ko‘ra, ekspertlar Telegramni bloklash allaqachon boshlanganini aytishmoqda.
