Yaqin Sharqdagi urush saratonni davolash uchun zarur dorilar ta’minotini xavf ostiga qo‘ydi

Farmatsevtika sanoati rahbarlarining Reuters'ga bildirishicha, Yaqin Sharqdagi urush Fors ko‘rfazi hududiga muhim dorilarning yetib berilishini to‘smoqda, bu esa saratonni davolash uchun zarur dorilar va sovitishni talab qiladigan boshqa davolash vositalari uchun ta’minot yo‘llarini xavf ostiga qo‘yib, kompaniyalarni reyslarni qayta yo‘naltirish hamda mintaqaga quruqlik orqali kirish yo‘llarini topishga majbur qilmoqda.

 

Ikki hafta oldin AQSh va Isroilning Eronga qilgan hujumlari bilan boshlangan va Eronning mintaqa bo‘ylab zarbalari bilan kengaygan mojarolar asosiy havo tranzit markazlarini ishdan chiqardi va dengiz yo‘llarini yopdi, bu esa dorilardan tortib oziq-ovqat va neft mahsulotlarigacha bo‘lgan tovarlarning harakatini murakkablashtirdi.

 

Ma’lum qilinishicha, hozircha katta yetishmovchilik kuzatilmayotgan bo‘lsa-da, mojarolar davom etsa bu holat o‘zgarishi mumkin. Ko‘rfaz mamlakatlarining dori-darmon bilan ta’minlanishi import bilan bog‘liq bo‘lib, ayrim dorilarning saqlash muddati qisqa hamda qat’iy sovitish zanjiri talab qilinadi, shuning uchun uzoq quruqlik transporti dori yetkazib berishda ma’qul yechim sifatida ko‘rilmayapti.

 

G‘arb davlatlaridagi dorixona kompaniyalari rahbarlari Fors ko‘rfaziga muqobil yo‘llarni izlayotganini va ba’zi dorilarni Saudiya Arabistonidagi Jidda va Ar-Riyod aeroportlaridan quruqlik orqali yetkazishga harakat qilayotganini bildirdi. Boshqa variantlar sifatida Istanbul va Oman ko‘rib chiqilmoqda.

 

Mintaqadagi asosiy aeroportlar, jumladan Dubay, Abu-Dabi va Doha, AQSh va Isroil hujumlariga javoban Eron tomonidan amalga oshirilgan zarbalar tufayli yopildi. Dubay va Doha Yevropani Osiyo va Afrikaga bog‘lovchi asosiy yuk tashish markazlari bo‘lib, Emirates va Etihad aviakompaniyalari hamda DHL kabi logistika firmalari xavfli dorilarni belgilangan harorat oralig‘ida saqlanishini ta’minlaydi, bu dorilar xavfsiz va samarali bo‘lishi uchun zarur hisoblanadi.

 

Antverpen menejment maktabi professori Vuter Devulf sanoat ma’lumotlariga tayanib, global havo yuklarining beshdan bir qismidan ko‘prog‘i, ya’ni muhim yoki hayotni saqlab qoluvchi dorilar va vaksinalar tashishning asosiy yo‘nalishi Yaqin Sharqdagi uzilishlarga duchor bo‘lishini bildirdi.

 

Bir rahbar ayrim dorilar uchun ishlatiladigan muqobil "sovuq zanjirli yo‘laklar" yoki haroratni nazorat qiluvchi yo‘nalishlarni bir kechada o‘rnatib bo‘lmasligidan ogohlantirdi.

 

Shuningdek, AQSh-Isroil va Eron urushi oqibatida havo yo‘llarining yopilishi tezkor jarrohlik amaliyoti o‘tkazilishi zarur bo‘lgan bemorlarda va onkologik kasallikka chalingan insonlarda mavjud kasallikning zo‘rayishiga sabab bo‘lishi mumkin.