Afgʻonistondagi kasalxonaga qilingan hujum oqibatida 400 kishi halok bo‘ldi

Afgʻoniston rasmiylari Kobul shahridagi tibbiyot muassasasiga uyushtirilgan havo hujumi oqibatida kamida 400 kishi halok bo‘lganini maʼlum qildi. Dastlabki maʼlumotlarga ko‘ra, yana qariyb 250 kishi jarohat olgan.

 

Afgʻoniston tomoni mazkur hujum uchun Pokistonni ayblamoqda. Rasmiylarning bildirishicha, zarba giyohvandlikka qarshi davolash xizmatlarini ko‘rsatadigan kasalxonaga berilgan. Hujum kechqurun sodir bo‘lgan va tibbiyot muassasasi binosiga jiddiy zarar yetkazgan.

 

Afgʻoniston rasmiylari hujum fuqarolik obyektiga qaratilganini taʼkidlab, uni xalqaro huquq normalarining buzilishi sifatida baholamoqda.

 

Pokiston tomoni esa bu ayblovlarni rad etgan. Islomobod rasmiylariga ko‘ra, havo zarbalari Kobul hamda Nangarhor viloyatlaridagi nishonlarga qaratilgan bo‘lib, ular harbiy maqsadlarda foydalanilayotgan obyektlar bo‘lgan.

 

Mazkur voqea Afgʻoniston va Pokiston o‘rtasidagi keskinlik kuchayib borayotgan bir paytda sodir bo‘ldi. So‘nggi haftalarda ikki davlat chegarasi hududlarida otishmalar bo‘lgani haqida ham xabarlar tarqalgan.

 

Pokiston rasmiylari mamlakat hududida sodir etilgan ayrim hujumlarda ishtirok etgan jangarilar Afgʻoniston hududida boshpana topayotganini daʼvo qilmoqda. Afgʻoniston esa bu ayblovlarni inkor etib, Pokistonni o‘z suverenitetini buzganlikda ayblamoqda.