“AQSHning Kubani egallashi bu katta sharafdir” — Donald Tramp
AQShning Kubaga neft yetkazib berilishini taqiqlagani fonida mamlakatda blekaut yuz berdi.
Qo‘shma Shtatlar prezidenti Oval kabinetda so‘zlagan nutqida Kubani egallash uning asosiy maqsadlaridan biri bo‘lganini aytdi. Bu haqda CNN xabar bermoqda.
“Kubani biror shaklda egallash, ha, Kubani egallash — ya’ni uni ozod qilamanmi, egallaymanmi, men u bilan xohlaganimni qila olaman, deb o‘ylayman”, — degan Tramp.
Shuningdek, AQSh Kubaga keladigan neft oqimini to‘xtatganidan beri birinchi marta butun mamlakat bo‘ylab blekaut sodir bo‘ldi.
Kubadagi elektr tarmoqlari operatori, UNE kompaniyasi, uzilishning aniq sabablari aniqlanayotganini ma’lum qildi.
Ma’lum qilinishicha, Kuba elektr energiyasi ishlab chiqarish va uzatish tizimi juda eskirgan bo‘lib, ilgari ham nosozliklar kuzatilgan. Hozir esa ushbu muammolarga elektr stansiyalari uchun yoqilg‘i yetishmasligi ham qo‘shildi.
AQSH 2026-yil yanvar oyida Kubaga do‘st bo‘lgan Venesuela yetakchisi Nikolas Maduroni qo‘lga olganidan keyin, Kubaga neft va neft mahsulotlari yetkazib berish amalda to‘xtadi.
AFP agentligi xabar berishicha, orolning turli hududlarida bir necha soatlik elektr uzilishlari odatiy holga aylangan. Mart oyining boshida esa mamlakatning asosiy elektr stansiyasidagi nosozlik tufayli mamlakatning ikki qismida elektr o‘chgandi.
Reuters agentligi bu yil Kubadagi portlar faqat ikkita kichik yoqilg‘i kemasini qabul qilganini bildirdi. Ulardan biri yanvarda Meksikadan Gavanaga neft yetkazgan, ikkinchisi fevralda Yamaykadan suyuq gaz (odatda gaz pechlari uchun ishlatiladi) olib kelgan.
Venesuela, ilgari Kubaga asosiy yoqilg‘i yetkazib beruvchi davlat bo‘lgan, bu yil hech qanday yetkazib berish amalga oshirmagan.
