“Energosavdo” muhandisi jarimani kamaytirib berish evaziga pora olayotganda qo‘lga olindi
U elektr energiyasidan noqonuniy foydalangan fuqaroning 1,8 mlrd so‘m miqdordagi jarima summasini 210 mln so‘mga tushirib berish evaziga pul talab qilgan.
“Hududiy elektr tarmoqlari” AJning “Energosavdo” filiali Farg‘ona bo‘linmasi muhandisining o‘z xizmat mavqeidan foydalanib fuqarodan pora talab qilgani aniqlandi. Bu haqda Zamon.uzga DXX xabar berdi.
Ma’lum qilinishicha, muhandis O‘zbekiston tumanida yashovchi fuqaroga tegishli xonadon va xususiy bog‘chada elektr energiyasidan noqonuniy foydalanganlik holati bo‘yicha rasmiylashtirilgan dalolatnoma yuzasidan hisoblangan jami 1,8 mlrd so‘m jarima summasini 210 mln so‘mga tushirib berish evaziga 10 ming AQSH dollari talab qilgan.
Muhandis so‘ralgan pul mablag‘idan 9 ming AQSH dollarini uchinchi shaxs orqali olgan vaqtida qo‘lga olingan.
Hozirda unga nisbatan jinoyat ishi qo‘zg‘atilib, “qamoq” ehtiyot chorasi qo‘llanildi. Tergov harakatlari olib borilmoqda.
