Islom sivilizatsiyasi markazi so‘z go‘zalligining oliy ifodasi
Markaz nafaqat ilm-fan xazinasi, balki Islom xattotlik san’atining oliy namunasini o‘zida ifoda etadi.
Toshkentga yangicha ko‘rkamlik berib, poytaxtimizning markazida qad rostlagan Islom sivilizatsiyasi markazi nafaqat ilm-fan xazinasi, balki Islom xattotlik san’atining oliy namunasini o‘zida ifoda etadi.
Bino devorlarida qadimiy kufiy va nafis suls xatlarida bitilgan muqaddas Qur’on oyatlari, Payg‘ambarimiz Muhammad sollallohu alayhi va sallamning hikmatli hadislarini hamda Alloh taoloning 99 go‘zal ismi (Asmaul husna) o‘ziga xos mahorat bilan joylashtirilgan.
Bu xattotlik durdonalari asrlar osha yashab kelayotgan islomiy qadriyatlar va ma’rifat nurini bugungi kun bilan bog‘lovchi ko‘prik kabidir. Kufiy xatining qat’iy geometrik shakllari va suls xatining maftunkor egiluvchan harakatlari uyg‘unligida aks etgan muborak bitiklar, markazga tashrif buyurgan har bir insonni tafakkurga chorlaydi.
Ushbu fasadlar binoning bezagi o‘laroq o‘zbek xattotlik maktabining yuksak cho‘qqisi hamda Islom olamining ma’naviy qudratini namoyish etuvchi ochiq osmon ostidagi betakror go‘zallikdir.
Ta’kidlash joizki, bezaklarda muqarnaslar, o‘simliksimon va geometrik naqshlar, shuningdek, Temuriylar me’morchiligiga xos firuza-oltin bilan sirlangan koshinlar ishlatilgan.
Matnlar bilim, mehr-shafqat, e’tiqod, adolat, ota-onaga hurmat va ruhiy kamolot kabi mavzularni ham qamrab olgan.
Markaz 2026-yilning eng diqqatga sazovor maskanlaridan biri sifatida e’tirof etilayotgani bejiz emas. Markazning o‘ziga xos me’moriy yechimi — ulkan gumbazi va betakror naqshlari sayyohlarga bir vaqtning o‘zida ham Islom dini go‘zalligini his qilish, ham eng zamonaviy multimedia texnologiyalari orqali virtual sayohatga chiqish imkoniyatini taqdim etadi.
