Isroil Ali Larijoniy halok bo‘lganini ma’lum qildi
Shuningdek, “Basij” kuchlari qo‘mondoni G‘ulomrizo Sulaymoniyning ham o‘ldirilgani aytilmoqda.
Isroil mudofaa vaziri Israel Katzning ma’lum qilishicha, Eron milliy xavfsizlik xizmati oliy kengashi rahbari Ali Larijoniy va “Basij” kuchlari rahbari G‘ulomrizo Sulaymoniy tungi havo zarbalarida o‘ldirilgan.
Eron davlat ommaviy axborot vositalari hozircha bu xabarni tasdiqlamadi, biroq Larijoniyning idorasidan tez orada rasmiy bayonot e’lon qilinishi aytilgan.
Isroil armiyasi avvalroq Tehron bo‘ylab keng qamrovli zarbalar berilganini va Livandagi “Hizbulloh” jangarilariga qarshi hujumlarni kuchaytirilganini ma’lum qilgan.
Larijoniy sobiq parlament spikeri bo‘lib, marhum Ali Xomanaiyga yadroviy muzokaralarda maslahatchi sifatida xizmat qilgan. Sulaymoniy esa “Basij” kuchlarini boshqarib, ichki noroziliklarni bostirishda faol ishtirok etgan va AQSH hamda Yevropa Ittifoqi tomonidan sanksiyaga uchragan.
Isroilga ko‘ra, Sulaymoniyning o‘ldirilishi “Basij”ning boshqaruv tizimiga jiddiy ta’sir qilishi mumkin.
