Isroil Livanda “Hizbulloh”ga qarshi quruqlik amaliyotini boshladi

Isroil armiyasi Livan janubida “Hizbulloh” guruhiga qarshi cheklangan va maqsadli quruqlik amaliyotlari boshlanganini ma’lum qildi. 

 

Isroil harbiy kuchlari operatsiyadan ko‘zlangan maqsad — guruh a’zolari va ularning infratuzilmasini yo‘q qilishdan iborat ekanini bildirdi.

 

Ma’lumotlarga ko‘ra, Isroil ushbu maqsadda Litani daryosidan janubdagi hududni to‘liq nazoratga olishni rejalashtirmoqda.

 

The Times of Israel avvalroq janubiy Livandagi janglarda o‘nlab “Hizbulloh” jangchilari yo‘q qilinganini xabar qilgan. Bu ma’lumotni Isroil mudofaa idorasi tasdiqlab, qurol omborlari, qo‘mondonlik markazi va kuzatuv nuqtalari ham yo‘q qilinganini qo‘shimcha qilgan.

 

16-mart kuni kechqurun Germaniya, Italiya, Fransiya, Buyuk Britaniya rahbarlari Isroilni Livandagi hujumdan voz kechishga chaqirgan. Qo‘shma bayonotda bu harakatlar “vayronkor gumanitar oqibatlarga olib kelishi va uzoq davom etuvchi mojaroni keltirib chiqarishi mumkinligi” ta’kidlangan.

 

Bayrut hukumatining ma’lumotlariga ko‘ra, “Hizbulloh” joylashgan hududlarga qarshi Isroil zarbalari natijasida Livanda bir milliondan ortiq kishi uyini tark etishga majbur bo‘lgan. Bu mamlakat aholisining deyarli har oltinchisiga to‘g‘ri keladi. Eng ko‘p zarar janubiy Livan va poytaxtning janubiy qishloqlaridagi aholi uchun yuzaga kelgan. Hujumlar oqibatida taxminan 850 kishi halok bo‘lgan.