Istanbulda 7 yil avval bedarak yo‘qolgan o‘zbekistonlik ayolning o‘ldirilgani aniqlandi

Istanbulda 2019-yilda bedarak yo‘qolgani aytilgan o‘zbekistonlik Hurriyat Tursunboyevaning o‘ldirilgani aniqlandi. Bu haqda NTV xabar berdi.

 

Ma’lum qilinishicha, ayol turmush o‘rtog‘i tomonidan o‘ldirilgan. Jinoyat Istanbulning Yoqolgan shaxslar byurosi qoshida tuzilgan maxsus guruh tomonidan yetti yil o‘tib qayta ko‘rib chiqilgan tergov natijasida aniqlangan.

 

Tergov davomida ayolning Maltepe tumanidagi qo‘shnilari so‘roq qilingan. Gumonlanuvchi, ya’ni marhumaning eri Ersin Y. qo‘shnilarga rafiqasi deportatsiya qilinganini aytgan. Biroq qo‘shnilar o‘sha paytda xonadondan kuchli hid kelganini bildirgan, erkak esa buni uyda kabutar boqayotgani bilan izohlagan.

 

Tekshiruvlar ayolning Turkiyadan chiqib ketgani haqida hech qanday ma’lumot yo‘qligini ko‘rsatgan. Aksincha, uning nomidagi telefon mamlakat ichida faol ishlatilgan. Marhumaning opasi bergan ko‘rsatmalariga ko‘ra, er-xotin o‘rtasida muntazam janjallar bo‘lib turgan.

 

Gumonlanuvchi rafiqasi “yo‘qolganidan” so‘ng, “meni tashlab ketdi”, deb ajrim uchun ariza bergan va 2024-yilda ayol sudga kelmagani sababli nikoh rasman bekor qilingan. Shuningdek, erkak boshqa shaxs hujjatlaridan foydalangan holda yashirinib yurgani aniqlangan.

 

Prokuratura ruxsati bilan o‘tkazilgan tekshiruvda xonadonda maxsus luminol moddasi yordamida qon izlari topilgan.

 

Ersin Y. 2026-yil 9-mart kuni Gruziyadan Turkiyaga kirib kelayotganida qo‘lga olingan. So‘roq davomida u jinoyatni tan olib, janjal vaqtida rafiqasini urib o‘ldirganini bildirgan.

 

Uning aytishicha, jasad bir muddat uyda saqlangan, so‘ng bo‘laklarga bo‘linib, chiqindi konteyneriga tashlab ketilgan.

 

Hozirda sud qarori bilan gumonlanuvchi hibsga olingan. Unga hujjatlarini berib, yordam berganlikda gumon qilingan shaxs esa sud nazorati ostida qo‘yib yuborilgan.