Jahon banki Oʻzbekistonda gaz sizib chiqishini kamaytirish uchun 10,6 mln dollar grant ajratadi
Ta’mirlash ishlari orqali yiliga 47,5 ming tonna gaz sizib chiqishining oldi olinishi rejalashtirilmoqda.
Jahon banki Oʻzbekistonda gaz transporti infratuzilmasidagi sizib chiqishlarni kamaytirish uchun 10,6 million dollar miqdorida grant ajratadi.
Bank tomonidan e’lon qilingan hisobotga ko‘ra, mamlakatdagi gaz uzatish tizimining bir qismi eskirgani hamda uzoq vaqt davomida yetarli texnik xizmat va ta’mirlash ishlari amalga oshirilmagani sababli gaz sizib chiqishlari va moliyaviy yo‘qotishlar yuzaga kelmoqda.
Mutaxassislar hisob-kitobiga ko‘ra, zarur ta’mirlash ishlari amalga oshirilmasa, 2030-yilga borib gazning umumiy yo‘qotishlari 1,75 milliard kubometrga yetishi mumkin. Bu esa taxminan 228 million dollar miqdorida yo‘qotilgan daromadga teng bo‘ladi.
Grant mablag‘lari “Oʻztransgaz” tomonidan boshqariladigan gaz uzatish tarmoqlarida sizib chiqishlarni aniqlash va bartaraf etish tizimini yo‘lga qo‘yishga yo‘naltiriladi. Loyiha Global Gas Flaring Reduction Partnership trast jamg‘armasi doirasida moliyalashtiriladi.
Rejalarga ko‘ra, 2029-yilga qadar amalga oshiriladigan ta’mirlash ishlari orqali yiliga qariyb 47,5 ming metrik tonna gaz sizib chiqishining oldi olinadi. Tejalgan gaz iste’molchilar va biznes subyektlariga yo‘naltiriladi, natijada yo‘qotishlarning kamayishi yiliga taxminan 18 million dollar iqtisodiy samara berishi kutilmoqda.
